Пабачыў свет «Буквар», напісаны ў ВКЛ 400 гадоў таму

«Адзіны ў сваім родзе помнік асветніцкай думкі Беларусі, найбольш ранні друкаваны дапаможнік для пачатковага навучання грамаце», — так Нацыянальная бібліятэка апісвае «Буквар» 1618 году, які цяпер стаў даступны шырокай аўдыторыі

У Нацыянальнай бібліятэцы Беларусі 28 жніўня прадставілі факсімільнае выданне першага «Буквара». Арыгінальны «Буквар» быў надрукаваны ў 1618 годзе ў Віленскім праваслаўным брацтве Святога Духа ў Еўе.

Гэтае выдавецтва было адным з самых старадаўніх і ўплывовых у Вялікім княстве Літоўскім. Яно выпускала нямала кніг на царкоўнаславянскай, старабеларускай і польскай мовах.

Захавалася толькі два асобнікі арыгінальнага «Буквара». Адзін цяпер захоўваецца ў Бібліятэцы Мідл Тэмпл у Вялікай Брытаніі, другі  — ў Каралеўскай бібліятэцы ў Даніі. На беларускіх землях арыгіналаў не засталося.

Факсімільнае выданне — гэта 26 поўнакаляровых аркушаў (52 старонках) на царкоўнаславянскай мове (надрукавана паўуставам) з захаваннем усіх дэфектаў і памылак, таксама выданне ўтрымлівае пераклад на сучасную беларускую мову, малітвы, рэлігійныя гімны, запаветы і пропаведзі.

У прэзентацыі ўзялі ўдзел дырэктар Нацыянальнай бібліятэкі Раман Матульскі і ягоны намеснік па навуковай і выведніцкай дзейнасці Алесь Суша (гэта ён у 2015 годзе атрымаў доступ да «Буквара», што захоўваецца ў Брытаніі — з таго пачалася работа над беларускім факсіміле), міністэрстваў культуры і адукацыі, прадстаўнікі Нацыянальнага інстытута адукацыі, а таксама «Белінвэстбанка» і Эўрапейскага банка рэканструкцыі і развіцця, якія выступілі партнёрамі праекта.