Павел Каралёў: “Куфар старажытнасцяў” – гэта спроба ўратаваць беларускую спадчыну!”

На працягу беларускай гісторыі вельмі шмат айчынных “памятак мінулага” было знішчана з-за нядбайнасці. Гісторык, экскурсавод і краязнаўца Павел Каралёў прыдумаў свой варыянт захавання гістарычнай памяці.

“Мы знаходзім беларускія старажытнасці, аддаем іх на рэстаўрацыю, а пасля ладзім выставы, каб як мага больш людзей магло здзівіцца помнікам, атрымаць уражанні ад гістарычных адметнасцях, – распавядае пра праект яго аўтар. – Гісторыю Беларусі лепш зразумець, калі ты непасрэдна дакранаешся да рэчаў, якімі карысталіся нашыя продкі”.

Праект рэалізоўвацца ў гонар братоў Луцкевічаў, адных з лепшых збіральнікаў на нашых землях, людзей, якія прыклалі вялікія намаганні дзеля стварэння беларускай незалежнасці.

У калекцыю “Куфара старажытнасцяў” ўваходзяць старыя паштоўкі, фотаздымкі, квiткі і білеты (ёсць адзiн з подпiсам Тарашкевiча), аўтографы нашых класікаў.

Есць сярод рэдкіх прадметаў у праекце і татарскі кумган з Відзаў-Лаўчынскіх – гэта абрадавы посуд для амавення. Надзвычай рэдкі гістарычны прадмет для нашых земляў. На ім змешчана дата 1912 год. Вось такая своеасаблівая лямпа Аладзіна.

Асобнае месца займае ратаванне драўляных беларускiх абразоў. Многія з іх былі ў вельмі кепскім стане. Але з дапамогай неабыякавых беларусаў у праекце “Куфар старажытнасцяў” паўстала цэлая калекцыя, праведзена рэстаўрацыя твораў. І цяпер яна вандруе як перасоўная выстава “Нябёсная варта Беларусі”. Адметна, што некаторыя абразы экспануюцца ў ліштвах (аканіцах), якія таксама атрымалася зберагчы і аднавіць.

Быў уратаваны і ўнікальны абраз XVIII стагоддзя, які за савецкім часам дзесяцігоддзі выкарыстоўваўся ў якасці дошак, забітых у сцяну звычайнай хаты. Цяпер гэта адна з самых важных “вернутых каштоўнасцей” праекта. Была праведзена рэстаўрацыя помніка і ён экспануецца на выставах.

У калекцыi “Куфара старажытнасцяў” ёсць i самi куфары: вялiзныя драўляныя скрынi, якiя нашыя продкi выкарыстоўвалi як шафы, дзе захоўвалi рознае начынне, хатні “скарб”.

Павел Каралёў знайшоў і сапраўдны скарб царскіх манет, які быў перададзены навукоўцам. Цяпер ён захоўваецца ў Інстытуце гісторыі Беларускай Акадэміі навук. Узнагароджанне Паўлу не было выплачана. Але ён не сумуе з гэтай нагоды, радуецца, што манеты і іншыя рэчы не зніклі, не паехалі “на сметнік”, а зберагліся.

Праект “Куфар старажытасцяў” – гэта заява, што нельга знішчаць сваю гісторыю. Як пісаў Уладзімір Караткевіч: “Варты жалю той, хто не ведае былога, і таму не можа разабрацца ў сённяшнім і прадбачыць будучыні”.

Запрашаем да супрацоўніцтва і агульнай працы дзеля ратавання беларускай спадчыны. Вы таксама можаце перадаць розныя рэчы (прадметы з гісторыяй) для захавання і папулярызацыі. Зберажом спадчыну разам! Далучайцеся да спраў праекта!

Запрашаем фундаратаў адукацыйных і культурніцкіх ініцыятыў падтрымаць праект “Куфар старажытнасцяў” Паўла Каралёва – гісторыка, экскурсавода, музейшчыка і краязнаўцы.

Пра праект

Музейны праект стараецца ўратаваць памяткі мінулага: старыя абразы, рэдкія кнігі, фотаздымкі – усё, што мае значэнне для беларускай гісторыі і культуры. Памяткі не проста выратоўваюцца, а пасля экспануюцца на выставах – для дарослых і дзяцей праводзяцца заняткі і лекцыі з паказам прадметаў старажытнасцяў. Ніхто з нас, беларусаў, не ўратуе спадчыну лепш. Далучайцеся да праекта “Куфар старажытнасцяў”!

Як падтрымаць праект

• стаць адным з фундараў праекта “Куфар старажытнасцяў” – за вашыя ахвяраванні будуць набытыя новыя рарытэты для праекта ці адрэстаўраваны набытыя раней;
• перадаць ўласныя прадметы з гісторыяй для захвання і папулярызацыі;
• прафінансаваць выпуск цыкла краязнаўчых артыкулаў Паўла Каралёва на партале “Планета Беларусь”;
• прапанаваць свае варыянты падтрымкі праекта.

Падпісацца на Тэлеграм-канал праекта можна тут.

Кантакты каардынатараў праекта: +375 29 7762435 ( Павел Каралёў), karaliou1982@gmail.com

Старонка у Фэйсбуку.

Старонка ў Інстаграм.