Самага старога беларуса свету Барыса Кіта пахаваюць у Вісбадэне 15 лютага

Амерыканскі навуковец беларускага паходжання Барыс Кіт будзе пахаваны на праваслаўных могілках царквы Святой Лізаветы.

На гэтых могілках Вісбадэна Барыс Кіт выкупіў участак каля трыццаці год таму.

Вядомы беларускі дзеяч замежжа, грамадзянін ЗША Барыс Кіт памёр 1 лютага ў Франкфурце-на-Майне на 108-м годзе жыцця. Затрымка з датай пахавання выклікана пошукамі  дакумента на ўчастак, паведаміла Радыё Свабода.

Барыс Кіт нарадзіўся 6 красавіка 1910 года ў Санкт-Пецярбурзе ў сям’і беларуса. Пасля рэвалюцыі з'ехаў на радзіму бацькі ў вёсцы Агароднікі Карэліцкага раёна, закончыў Наваградскую беларускую гімназію, Віленскі ўніверсітэт. Паводле адукацыі быў настаўнікам, былы дырэктар Віленскай і Наваградскай гімназій. Па вайне эміграваў у ЗША.

Барыс Кіт — амерыканскі навуковец, які зрабіў значны ўнёсак у сусветную астранаўтыку. Ён з'яўляецца суаўтарам падручніка па ракетным паліве Rocket Propellant Handbook (у суаўтарстве; Boris Kit, Douglas S. Evered), 1st ed. — New York: The Macmillan Company, 1960., якім дасюль карыстаюцца ў амерыканскіх універсітэтах.