Свята ў Барысаве

14 жніўня ў Барысаве арцыбіскуп Тадэвуш Кандрусевіч здзейсніў пасвячэнне новазбудаванага касцёла Спаслання Духа Святога.

Сімвалічна, што гэтая ўрачыстая падзея, якую вернікі маладой каталіцкай супольнасці аднаго з найбуйнейшых райцэнтраў Беларусі чакалі больш за дзесяць гадоў, адбылася ў год святога Юзафа – Апекуна паўсюднага Касцёла.

Пачалася урачыстасць шэсцем святароў.

На прыступках новай святыні парафіяне ўручылі арцыбіскупу Тадэвушу Кандрусевічу сімвалічны ключ ад храма.

Пасля слоў удзячнасці ён пагрукаў ключом у дзверы і сказаў: “З радасцю ўвойдзем у дом Божы!”

І рака вернікаў пацякла ў касцёл...

На пачатку ўрачыстасці пасвячэння касцёла Спаслання Духа Святога ў Барысаве пробашч парафіі ксёндз канонік Аляксей Раманчук, чыімі намаганнямі вялося будаўніцтва святыні і добраўпарадкаванне прылеглай тэрыторыі, коратка распавёў гісторыю, як у Барысаве з’явіўся гэты новы касцёл. Ён падзякаваў усім тым святарам і парафіянам, якія прычыніліся да будаўніцтва новай святыні, сказаў добрыя словы ў бок мясцовых уладаў за выдзеленую зямлю пад касцёл.

Імша ў Барысаве, якую вёў арцыбіскуп Тадэвуш Кандрусевіч, была вельмі моцнай і кранальнай.

Сваёй прамовай заслужаны іерарх вызываў у вернікаў то смех, то слёзы, ён прыводзіў алегорыі, расказваў смешныя гісторыі, якія мелі глыбокі сэнс.

Пад час выкананання ўсіх неабходных працэдур асвячэння новага касцёла мяне ўразіла еднасць усіх прысутных.

Было адчуванне, што тут сабраліся сапраўдныя патрыёты роднай зямлі.

І ўжо не мела значэння – ты святар ці просты вернік.

Усе мы хочам, каб Беларусь была шчаслівай краінай.

І кожны з нас робіць для гэтага ўсё, што можа.

Арцыбіскуп Тадэвуш Кандрусевіч перадае пробашчу парафіі ксёндзу Аляксею запаленую свечку, і той запальвае свечкі на алтары. Касцёл асвечаны!

Гучаць словы ўдзянасці ксяндзу Аляксею за зробленую працу – і яны патанаюць у апладысментах. Такія апладысменты гучаць толькі пасля выступленняў таленавітых артыстаў! Да іх далучаецца і самы маленькі наведвальнік касцёла…

А віншаванне працягваецца.

Вернікі Барысава ўдзячны ўсім, хто дапамог пабудаваць касцёл. І ў першую чаргу яны адзначаюць арцыбіскупа Тадэвуша Кандрусевіча. І не проста адзначаючь, а ўручаюць яму майку гульца барысаўскага футбольнага клуба “БАТЭ”.

Будзем спадзявацца, што такая падтрымка дапаможа мясцовай камандзе ў будучым сезоне.

Здымак на памяць усіх святароў, якія прымалі ўдзел у пасвячэнні касцёла.

І працяг святочнага мерапрыемства – у памяшканнях касцёла адкрылася выстава фотамастачкі Ірэны Гудзіеўскай.

Увечары ў касцёле адбыўся канцэрт.

Упэўнены, што жыхароў Барысава і гасцей горада могуць зацікавіць не толькі мерапрыемствы ў касцёле, але і яго бліжэйшае атачэнне.

Ксёндз Аляксей нарадзіўся ў вёсцы Ўдзела, побач са славутым Мосарам, дзе служыў знакаміты ксёндз Булька і быў створаны унікальны прыродна-рэлігійны комплекс, што прыцягваў у Мосар тысячы турыстаў. Мосар быў прыкладам для ўдзельскага касцёла Беззаганнага Зачацця Панны Марыі...

Тое ж самае, мы спадзяемся, адбудзецца і ў Барысаве.

Людзі хочуць бачыць прыгажосць. І вакол новага барысаўскага касцёла яна ёсць!

І мы павінны ведаць тых людзей, якія робяць нашу зямлю прыгажэйшай.

Ксёндз Аляксей са сваімі бацькамі, пані Ўладзіславай і панам Вікенціем. Думаю, 14 жніўня 2021 года яны былі самымі шчаслівымі жыхарамі Беларусі. А разам з імі – і ўсе тыя, хто арганізоўваў і прымаў удзел у пасвячэнні новага касцёла…