Як пробашч Чырвонага касцёла ў Мінску атрымаў пасведчанне пілота, каб ладзіць паветраныя пілігрымкі

Ксёндз Уладзіслаў Завальнюк стаў першым каталіцкім святаром у Беларусі, які мае пасведчанне пілота-аматара грамадзянскай авіяцыі. Ён упэўнены: гэта — новыя магчымасці для Касцёла і патрабаванне часу, на якое трэба адказваць.

Летась былі распачатыя верталётныя пілігрымкі у Будслаў.

А таксама ў Жыровічы.

«У кабіну можа змясціцца да сямі чалавек, таму гэта больш турыстычны тур, але і ён павінен мець сваіх душпастыраў, — зазначыў святар у інтэрв’ю сайту Catholic.by. — Я пабачыў зацікаўленасць такімі турамі ў прадстаўнікоў дзяржавіяцыі і адчуў, што справа мне вельмі блізкая і я гатовы яе папулярызаваць».

Цяпер пробашч Касцёла Святых Сымона і Алены мае права на кіраванне маламернымі самалётамі.

На самалёце, прызнаецца ён, можна пабачыць палову Беларусі за дзве-тры гадзіны:

«Гэта эканоміць час і адкрывае вялікія магчымасці, таму што ў самыя аддаленыя санктуарыі Беларусі больш не трэба ехаць аўтамабілем: туды можна даляцець. Атрымаецца паветраная пілігрымка, якую асабліва важна прапанаваць турыстам з-за мяжы, якія прыбываюць да нас без візы на пяць дзён».

Правы на асноўныя катэгорыі наземнага транспарту ў святара ўжо былі. Каб атрымаць пасведчанне пілота-аматара, ён спачатку наведваў заняткі па тэорыі ў Беларускай дзяржаўнай акадэміі авіяцыі, а пасля праходзіў лётную практыку.

«Вучыцца мне падабалася. Галоўнае — палюбіць неба, астатняе прыйдзе. Там такі прастор! Гэта незабыўна!» — не хавае эмоцый ксёндз Уладзіслаў.