Як выглядае «Прыпынак Адамовіча» ў Глушы

Арт-аб’ект, прысвечаны Алесю Адамовічу, прэзентавалі ў роднай вёсцы пісьменніка ў Бабруйскім раёне.

Мастак Аляксандар Благі размаляваў прыпынак на вуліцы, якую ў сярэдзіне 1990-гадоў не дазволілі назваць імем літаратара.

На прыпынку намаляваны вялікі партрэт Алеся Адамовіча, пададзеная цытата з яго аповесці «Vixi», у якой ён падкрэсліваў сваю любоў да родных глушанскіх мясцін.  Нарадзіўся пісьменнік у вёсцы Канюхі Капыльскага раёна, але праз два гады яго сям'я пераехала ў Глушу.

Ушанаваць памяць Адамовіча ў Глушы задумала суполка маладых рупліўцаў беларушчыны «Прыпынак Адамовіча».  Ад распрацоўкі ідэі, узгаднення праекта з уладай і да яго ажыццяўлення прайшло шэсць месяцаў.

Актывісты імкнуліся прыцягнуць увагу да пісьменніка Алеся Адамовіча, яго творчасці і роднай яму Глушы.

— Мы хочам зрабіць Адамовіча цікавым для цяперашняга пакалення беларусаў, — расказаў Андрусь Архіпенка. — Цяпер тыя, хто будзе ехаць па шашы, будуць бачыць прыпынак з Адамовічам. Яны даведаюцца, што ў гэтым пасёлку ён жыў.

Прыпынак Адамовіча — першы крок ушанавання памяці Адамовіча. Наступныя — яго бюст і стварэнне музея.

На прэзентацыю «Прыпынка Адамовіча» прыехала дачка пісьменніка Натальля Адамовіч. Гэта яна выбрала для аздаблення фотаздымак бацькі, на якім яму 55 гадоў, і папрасіла, каб на прыпынку быў занатаваны ўрывак з аповесьці «Vixi».

У САЙТА «ПЛАНЕТА БЕЛАРУСЬ» ПОЯВИЛСЯ КАНАЛ НА ЯНДЕКС ДЗЕН. ПОДПИСЫВАЙТЕСЬ!