Захапляючая прырода “Чырвонага Бора”

На самым поўначы Беларусі ёсць чароўны куточак прыроды ­– “Чырвоны Бор”.

Падарожжа ў краіну хараства пачынаецца адразу, як толькі ты зварочваеш у бок лясной дарогі ў напрамку турыстычнага комплексу. Абапал дарогі стаяць магутныя волаты-хвоі ўразлівага чырвонага колеру, ад чаго ўзнікае адчуванне поўнай бяспекі і бязмежнага супакою.

Пакуль ты павольна рушыш па дарозе, надзвычайны прыродны наркотык так моцна захапляе, што нават не адчуваеш хістанне машыны. Прырода настолькі зацягвае, што ты не вытрымліваеш і пакідаеш аўтамабіль.

І тады пачынаецца сапраўдны цуд: падчас першага кроку адчуваеш моц зямлі ў гэтым чароўным месцы, глыбокі глыток чыстага паветра надае сіл, з’яўляецца адчуванне ўсемагутнасці. Міжволі ногі цягнуць у бок лясной сцежкі ўглыб лесу, дзе знаходзіца шмат цікавага і таямнічага.

Спеў птушак, хістанне дрэў, трэск галін пад нагамі – усё гэта стварае мелодыю, пад якую ідзеш і міжволі танчыш.

А промні сонца, слізгаючы па галінах дрэў, распасцершыся на паверхні, утвараюць дзіўныя малюнкі.

Вочы, нібыта галодны звер, прагнуць разгледзець кожную дэталь, скачуць з аднаго аб’екта на іншы. І калі ты раптам затрымліваеш погляд на нечым крыху даўжэй, то заўважаеш, што ты не самотны і тут не адзін…

Прыгоды працягваюцца, і сцежка нейкім чынам выводзіць цябе да неабсяжнага возера.

Там ты знаходзіш лаўку, садзішся, забываешся на час і атрымліваеш асалоду ад маляўнічасці наваколля з замілаваннем у сэрцы.