Мір беларускіх мястэчак

Наша падарожжа пачынаецца ў мястэчку Будслаў, якое знаходзіцца ўсяго ў 120 км ад Мінска. Галоўная святыня мястэчка — касцёл Унебаўзяцця Найсвяцейшай Дзевы Марыі, грандыёзны помнік архітэктуры позняга барока, пабудаваны ў канцы XVII ст.

Гэта месца па праву лічыцца Нацыянальным санктуарыем (свяцілішчам). Тут захоўваецца цудатворны абраз Божай Маці, напісаны ў Рыме ў 1598 годзе, які ў 1998 годзе быў урачыста каранаваны папскімі каронамі. З таго часу Маці Божая Будслаўская абвешчана Апякункай і Каралевай Беларусі. У касцёле, які мае статус "Малой базілікі", знаходзіцца таксама ўнікальны драўляны алтар XVII ст. — сапраўдная жамчужына сакральнага дэкаратыўна-прыкладнога мастацтва. Касцёл дзівіць сваёй велічнай пышна-барочнай формай і багаццем дэкору.

Непадалёк ад Будслава, у вёсцы Порплішча, знаходзіцца каштоўны помнік драўлянага дойлідства — Спаса-Праабражэнская царква. Яна была пабудавана ў 1627 годзе як уніяцкая, а пасля перабудовы ў 1881 годзе пераасвячона ў праваслаўную. Гэтаму помніку народнай архітэктуры ўжо амаль 400 гадоў! Вы зможаце ўбачыць яе чатырохзрубную канструкцыю, завершаную гранёным купалам, і трох'ярусную вежу-званіцу.

Далей мы накіруемся ў Глыбокае — горад з шасцівяковай гісторыяй, размешчаны над пяццю азёрамі. Яго гістарычны цэнтр фармуюць два выдатныя храмы XVII стагоддзя: праваслаўны сабор Нараджэння Багародзіцы і парафіяльны Траецкі касцёл, якія дэманструюць буянства вытанчаных формаў "віленскага барока".

Што мы пабачым у Глыбокім:

• Пад’ём на вежу сабора — з вышыні птушынага палёту адкрываюцца цудоўныя краявіды з мноствам азёр.

• Спуск у падзямелле — вы ўбачыце сапраўдныя сляды гісторыі XVII стагоддзя.

• Алея знакамітых землякоў — на плошчы перад храмамі ўстаноўлены бронзавыя бюсты людзей, якія праславілі Глыбоччыну: авіяканструктар Павел Сухі, мастак Язэп Драздовіч, заснавальнік беларускага тэатра Ігнат Буйніцкі, прэм'ер-міністр БНР Вацлаў Ластоўскі, а таксама барон Мюнхгаўзен!  Дарэчы, Глыбокае называюць яшчэ "вішнёвай сталіцай" краіны.

Абед з дэгустацыяй — побач з "глыбоцкай вішняй" знаходзіцца гаспадарчая сядзіба Якімовічаў, дзе сярод сажалак, мосцікаў і альтанак мы запланавалі для вас абед з дэгустацыяй глыбоцкай згушчонкі.

Наш шлях пралягае да вёскі Удзела, дзе ўзвышаецца манументальны касцёл Беззаганнага Зачацця Дзевы Марыі. Гэты помнік архітэктуры з рысамі барока і класіцызму быў пабудаваны ў 1766–1791 гадах як частка ансамбля францысканскага кляштара. Побач з храмам знаходзіцца двух'ярусная брама-званіца.

Завяршэнне нашай экскурсіі — мястэчка Мосар, раней маёнтак Бжастоўскіх, з'яўляецца сапраўдным трыумфам чалавечай волі. Тут знаходзіцца касцёл Святой Ганны (1792 г.) — помнік архітэктуры класіцызму, які ніколі не зачыняўся за ўсю гісторыю свайго існавання, нават у савецкія часы.

Але галоўнае, што ўразіць вас у Мосары — гэта цудоўны дэндрапарк, разбіты на некалькіх гектарах вакол касцёла. Гэты парк з'яўляецца тварэннем рук і незвычайнай энергіі ксяндза Юзафа Булькі, які на працягу 20 гадоў ствараў гэты райскі куток. Сярод яго тварэння: тэматычныя кампазіцыі на асоцыяцыі з біблейскіх тэкстаў, фігурна пастрыжаныя дрэвы, скульптура "П'ета" — дакладная копія працы Мікеланджэла, скульптура Папы Рымскага Яна Паўла II, найвышэйшы ў Беларусі каталіцкі крыж, а таксама штучныя вадаёмы і алеі. Тут жа настаяцелем быў арганізаваны адзіны ў сваім родзе антыалкагольны музей.