Дах накрыюць гонтам. Так выглядае гарадзенскі лямус зараз

З кастрычніка пачаўся трэці этап па аднаўленні ўнікальнага драўлянага лямуса, які знаходзіцца на тэрыторыі былога кляштара брыгітак у Гродне. Спецыялісты накрыюць дах гонтам, а таксама выканаюць шэраг сталярных работ.

Рэстаўрацыя лямуса пачалася ў кастрычніку 2016 года. Курыруе ўсе працы Міністэрства культуры і нацыянальнай спадчыны Польшчы. З беларускага боку ёй апекуюцца прадстаўнікі «Гроднаграмадзянпраекта».

За два гады спецыялісты адрамантавалі падмуркі, ачысцілі ўсё ад постсавецкіх налётаў, замянілі некаторыя гнілыя элементы, а таксама знялі стары дах.

Трэці этап рэстаўрацыі прадугледжвае накрыццё даху гонтам, а таксама выкананне шэрагу сталярных работ: трэба будзе замяніць некалькі бэлек на страсе, адрамантаваць знешнюю лесвіцу і цэлую балюстраду. Галоўная задача для рэстаўратараў – як мага больш захаваць гэты помнік гісторыі ў першасным выглядзе. Завяршэнне чарговага этапу работ прадугледжана да канца 2018 года.

Гарадзенскі лямус— адзін з самых старых драўляных аб’ектаў у Беларусі. Аднаўленне яго стане важнай часткай маштабнай шматгадовай рэканструкцыі ўсяго комплексу брыгіцкага кляштара, дзе ў савецкія гады размяшчалася псіхіятрычная бальніца.

Пасля рэстаўрацыі тэрыторыя, дзе знаходзіцца лямус, стане адкрытай для ўсіх. У касцёльным музеі выставяць мноства экспанатаў, якія ёсць у каталіцкай дыяцэзіі. Сярод іх: рэдкія асобнікі кніг і дакументы XVII-XIX стагоддзяў.

Гродзенскі лямус — двухпавярховы дом з лоджыяй на другім паверсе і арачнымі галерэямі на галоўным фасадзе. Пабудаваны ў традыцыях беларускага народнага дойлідства, выкладзены з масіўных брусаў, без выкарыстання клямараў і металічных крапяжоў. Верагодна, пабудаваны ў другой палове XVIII ст., хаця і сёння дзе-нідзе ў літаратуры датуецца 1630 годам.